حدوتة جلال و الفول

حدوتة جلال و الفول

كان يا ما كان و لا يحلى الكلام الا بذكر النبى عليه الصلاة و السلام

كان فى ولد صغير اسمه جلال ,, فى يوم مامته صحته من النوم و قالتلو : اصحى يا جلال اصحى يا حبيبى عشان تفطر

جلال قال لمامته : صباح الخير يا ماما هوا الفطار ايه ؟

مامته قالتلو : هتفطر فول يا حبيبى

جلال قال : يووووووووووووووووووه هوا كل يوم فول , أنا مش واكل الفول دا

مامة جلال راحت للعصاية و قالت ليها : يا عصايا تعالى اضربى جلال عشان مش راضى ياكل الفول العصايا قالت : أنا ماليش دعوة

مامة جلال راحت للنار و قالت ليها : يا نار تعالى احرقى العصايا عشان مش عاوزة تضرب جلال عشان جلال مش راضى ياكل الفول النار قالت : أنا ماليش دعوة

مامة جلال راحت للماية و قالت ليها : يا ماية تعالى طفى النار عشان مش عاوزة تحرق العصاية اللى مش عاوزة تضرب جلال عشان جلال مش عاوز ياكل الفول الماية قالت : انا ماليش دعوة

جلال راحت للبقرة و قالت ليها : يا بقرة تعالى اشربى الماية عشان مش عاوزة تطفى النار اللى مش عاوزة تحرق العصاية عشان مش عاوزة تضرب جلال عشان جلال مش عاوز ياكل الفول البقرة قالت : انا ماليش دعوة

مامة جلال راحت للفلاح و قالت له : يا فلاح تعال ادبح البقرة عشان مش عاوزة تشرب الماية اللى مش عاوزة تطفى النار اللى مش عاوزة تحرق العصاية عشان مش عاوزة تضرب جلال عشان جلال مش عاوزة ياكل الفول الفلاح قال : انا ماليش دعوة

مامة جلال راحت لمامة الفلاح و قالت ليها : تعالى اضربى الفلاح عشان مش عاوز يدبح البقرة اللى مش عاوزة تشرب الماية اللى مش راضية تطفى النار اللى مش عاوزة تحرق العصاية اللى مش راضية تضرب جلال عشان جلال مش عاوز ياكل الفول

مامة الفلاح قامت تضرب الفلاح , الفلاح قام بسرعة يدبح البقرة , البقرة راحت بسرعة تشرب الماية , الماية راحت بسرعة تطفى النار , النار راحت بسرعة تحرق العصاية , العصاية راحت بسرعة تضرب جلال , جلال قام بسرعة و أكل الفول

و توتة توتة خلصت الحدوتة , حلوة و لا ملتوتة !!