حدوتة محروس بياع العرقسوس

حدوتة محروس بياع العرقسوس

كان يا ما كان و لا يحلى الكلام الا بذكر النبى عليه الصلاة و السلام

كان فيه ولد اسمه محروس و كان ابوه بيبيع عرقسوس و فى يوم باباه تعب جدا فقرر محروس انه يسيب المدرسه و يبيع عرقسوس

كانت امه تجهزله العرقسوس و ينزل هو يبيعه فى السوق ...و فى مره كان الملك بيتمشى فى السوق شافه و نادى له و قاله ايه اللى مسيبك المدرسه , قاله الحكايه الملك قاله هات العرقسوس اللى معاك و خد 50 جنيه و كل يوم الصبح تجيبلى العرقسوس و تاخد الفلوس و تروح مدرستك

فضل الموضوع كده لحد فى يوم ولد زميل محروس لاحظ ان محروس مبسوط فساله عن الحكايه و حكى له محروس الموضوع كلو , فالولد الشرير قرر انو يوقع بينه و بين الملك .

راح للملك و طلب انه يشوف الملك و قاله انا زميل محروس و بصراحه محروس بيشتكى ان جلالتك ريحه بقك وحشه قوى كل ما يقرب لك فأنا حبيت اقولك , الملك استغرب و قاله الكلام ده مش صحيح محروس ولد مؤدب و مهذب , الولد الشرير قاله لاحظ كده و هو بيقدم لك العرقسوس هتصدقنى .....

و بعد كده الولد راح لمحروس و قاله على فكره لى قريب فى القصر بيقول ان الملك بيتضايق قوى من ريحتك يا محروس و النبى و انت بتتكلم معاه ابقى ودى وشك الناحيه التانيه

لما محروس راح للملك و الملك لاحظ فعلا ان محروس بيدور وشه عنه الناحية التانية صدق الكلام و طرد محروس و أمر الحراس ان لما يجى الولد اللى بيبيع العرقسوس تانى يضربوه

و فعلا قرر محروس ما يروحش للملك تانى , لكن الولد صاحبه قرر انه هو اللى يبيع العرقسوس للملك و ياخد هوا الخمسين جنيه ....ولما راح الولد ,,, انضرب علقه محترمة طبعا لانهم كانوا فاكرينو محروس و اعترف بالحقيقه

نتعلم ايه يا أولاد يا حلوين من الحكايه دى ...ما نصدقش كل اللى بيتقالنا

و توتة توتة فرغت الحدوتة

حدوتة السمكة

حدوتة السمكة

كان يا مكان و لا يحلى الكلام الا بذكر النبى عليه الصلاة و السلام

كان مرة فيه سمكة لسة مولودة وبتكبر ببطء شديد وكانت متعرفش تعوم وكل اصحابها بيكبروا بسرعة وبيعرفوا يعوموا وهى راحت بكت لمامتها وقالت ليها يا مامى انا حزينة لأنى مش بعرف العب مع اصحابى ولا اشوف الحاجات الجميلة اللى بيحكوا عليها ولا اشوف اصداف ولا اسماك ملونة ولا اشوف بيت الاخطبوط ولا الرتسا ولا حاجة ابدا

مامتها قالت لها ولا تزعلى انا عندى الحل انتى تلبسى عوامة ....... انا عندى طوق صغير انتى تلبسيه وتتعلمى العوم ولازم تعرفى ان نوعنا بيكبر ببطء ....وانتى متزعليش

كل الاسماك لما شافتها بالعوامة بقوا يضحكوا ويتتريقوا عليها وده احزنها اكتر يقولوا لها كمان لابسة عوامة ؟؟؟؟ كمان ما بتحاوليش تتعلمى العوم ؟؟؟؟

قالت لهم مامى قالت لى كل شئ بأوانه .......لكنهم برضه فضلوا يضحكوا

وفى يوم نامت السمكة الصغيرة من غير ما تشعر والعوامة اخدتها على البر ....ولقت نفسها قرب الرمل

وفجأة ......لقت طائر النورس عمال يتفرج عليها ويضحك ويبتسم .........قالت له انت كمان بتضحك على العوامة ؟؟قال لها لألألأ انا عاجبنى الوانها .........فحكت له حكايتها

قال لها انا عندى اقتراح ........حايخللى كل اصحابك يعرفوا انك مختلفة ........وبعد كدة عمرهم ما حيضحكوا عليكى ابدا ........انا حخليكى تطيرى مش تعومى بس .....!!!طائر النورس اخدها وطار بيها .......وبعدين سابها

العوامة فضلت تتحرك بيها شمال ويمين ........واصحابها شافوها ومكانوش مصدقين سمكة وبتطير ؟؟؟؟؟؟؟؟ونزلت بشويش فى المية وهى سعيدة وبتضحك .......وقالوا لها فعلا فعلا انتى مختلفة واحنا آسفين عشان ضحكنا عليكى وعمرنا ما حانضحك على حد ولا حاجة احنا مش عارفينها

و توتة توتة خلصت الحدوتة حلوة و لا ملتوتة

حدوته الثعلب المكار و الحلة فوق النار

حدوته الثعلب المكار و الحلة فوق النار

كان يا مكان و لا يحلى الكلام الا بذكر النبى عليه الصلاة و السلام

كان عايش فى الغابة ارنب كبير و ابنة الارنب الصغير فى سعادة و هناء ... فى يوم من ذات ايام الشتاء حيث الغذاء قليل جاع الارنب الصغيرو طلب من الارنب الكبير الطعام ... خرج الارنب الكبير ليبحث عن الطعام و حذر الارنب الصغير من الخروج من الجحرحتى لا يأكلة الثعلب

الارنب الكبير غاب و غاب و غاب ... الارنب الصغير جوعان جوعان جوعان خرج الارنب الصغير من الجحر ليبحث عن الارنب الكبير ... و هنا قابلة الثعلب المكار , و عرف انو جوعان فقال لة تعال معى انا عندى طعام كتير.. مشى الارنب الصغير مع الثعلب المكار و الثعلب فى نيتة ان ياكلة طبعا .

عاد الارنب الكبير و معة برسيم كتير و أخذ يبحث عن الارنب الصغير فلم يجدة .... فخرج الى الغابة يبحث عنة .. شاهد الفرخة فقال لها فرخة يا فرخة ما شفتيش الارنب الصغير , قالت لأ .. قال لها تعالى دورى معايا .. بعد شوية شاهدوا الديك الرومى قالوا لة ياديك يا ديك , ما شفتش الارنب الصغير , قال لأ .. قالوا له تعال دور معانا ... بعد شوية قابلوا البطة .. و جرى نفس الحوار ... ثم قابلوا الوزة ثم المعزة ( و هكذا ممكن تطول الحدوتة زى ما الواحد عايز بعدد كل الحيوانات و الطيور ..

قابلوا الهدهد و اللى قال لهم انو شاف الارنب الصغير ماشى مع التعلب المكار فى طريقهم الى جحر التعلب .... جرت كل الحيوانات الى بيت الثعلب المكار و كان لة فتحة فى اعلاة .. نظروا منها جميعا فشاهدوا الثعلب المكار و الارنب الصغير و حلة كبيرة فوق النار فيها ماء يغلى ( طبعا الثعلب كان ناوى يسلق الارنب فى الحلة دى )

فكرت الحيوانات فى حيلة لانقاذ الارنب الصغير ... و قف الارنب الكبير على حافة فتحة السقف و نادى على الارنب الصغير ... هنا قال لة الثعلب المكار تعالى معنا فنحن نجهز الطعام .. قال له الارنب الكبير لا أستطيع النزول تعالى ساعدنى ... فقفز الثعلب لاحضار الارنب الكبير عشان ياكلو هوا كمان

.. تعاونت كل الحيوانات و الطيور فى دفع الثعلب لحد ما وقع فى حلة الماء المغلى

الارنب الصغير قال للارنب الكبير توبة انى مسمعش الكلام تانى و رجع الجميع سعداء

و توتة توتة فرغت الحدوتة حلوة ولا ملتوتة

حدوتة الدجاجة و الديك و الفار

حدوتة الدجاجة و الديك و الفار

كان يا مكان و لا يحلى الكلام الا بذكر النبى عليه الصلاة و السلام

كانت الدجاجه عايشة مع الديك والفأر سوا في منزل نظيف جميل مرتب

وعلى الجانب الاخر من التل كان تعيش عائله من الثعالب مكونه من ثعلب كبير و4 من الثعالب الصغيره .. وكان منزلهم مهدم وغير منسق ووحش .. وكان يقدروا يشوفوا منزل الدجاجه واصدقائها من علي بعد صحيت الثعالب الصغيره فى يوم و هيا جعانة جدا و قعدوا يشتكون لوالدهم الثعلب الكبير ويبكوا ... الثعلب الكبير قالهم أتهد ياواد انتى وهوه ... النهارده حيكون عندنا وليمه عظيمه عليها القيمة .. اشي ديول وفراخ وكمان فار على البيعه ... وكلهم ماشاء الله ملظلظين و مربربين .. جهزوا انتم النار والميه والتحابيش وانا مسافه السكه وارجع

فى نفس الوقت دا في بيت الفرخة واصدقائها .. كان فى نفس المشكله اليوميه اللى بتعانى منها الدجاجة .. وهى استلقاء الفأر والديك فى حال كسل دائم ويسيبوا كل اعمال المنزل من طهو وتنظيف وكل شئ من نصيب الدجاجه اللى ما كانت تشتكى ولكن كانت غير سعيدة لعدم مساعدتهم لها .. (حتى فى الحيوانات ياربى ) .. و كانت كل ما تطلب منهم عمل شئ مثل مساعدتها فى اعداد الفطور ... يتهرب كلا منهما على حدا ... مش انا .. مش انا... فتضطر الدجاجه لعمل كل شئ لوحدها

.. والدجاجه منهمكة فى اعمالها المنزليه والديك والفار فى حاله كسل استرخاء .. كان الثعلب قرب من المنزل وبالفعل سمع صوت اقدامه كلا من الفار و الديك اللى افتكروا انو ساعى البريد ... وسأل الفأر ان يذهب ويلاقاه ... فراح الفار وهو فى حاله نعاس و فجأة انقض عليه الثعلب و مسكه ووضعه فى شواله .. ولما وصل الثعلب لمكان الديك المسترخى , الديك قدر انو يصيح قبل ان يمسك به الثعلب ويضعه فى الشوال مع الفار .. وعندها سمعت الدجاجه الدوشه خرجت بسرعه قلقانه على اصدقائها ولكن الثعلب مسكها هيا كمان ووضعها معاهم .. ومشى فى الطريق الى بيته سعيدا

لكن داخل الشوال لم يكن الوضع مريح وجيد بالنسبه للدجاجه واصدقائها اللى بدا يحسوا ا بالاسف على عاداتهم وانانيتهم وكسلهم واعتذرا للدجاجه ... التى كانت منهمكه فى التفكير ازاى يتغلبوا على هذا الموقف اللى ممكن ان يؤدى بهم فى بطون الثعلب واولاده ... فى نفس اللحظه افتكرت الدجاجه انها دائما تحتفط بادوات الخياطه تحت جناحها معظم الوقت .. فاخبرت الديك والفار الا يقلقا .

فى ذللك الوقت بدا الثعلب يشعر بالتعب من الحمل الثقيل فقرر ان يستريح و نام تحت الشجره وعندها بدات الدجاجه بحذر فى فتح فتحه صغيره بمقص الخياطه ... وطلبت من الفار ان يخرج اولا وان يبحث عن حجر يكون فى حجمه ويحضره هنا بدون دوشه .... وكذللك الديك وفتحت له فتحه اكبر وطلبت منه ان يحضر ايضا حجر بحجمه .. وبعدها خرجت الدجاجه من الجراب واحضرت ايضا حجر فى حجمها تقريبا وتعاون الاصدقاء فى وضع الحجاره بالجراب وتولت الدجاجه خياطه الفتحه وابتعدوا بحذر وبعدها جريوا الى منزلهم ..

قام الثعلب من النوم ووضع الجراب على ظهره الذى بدا اثقل من السابق ولكنه استمر فى طريقه ولكنه قبل ان يصل الى المنزل تعثرت قدمه وتدحرج من التل وهو ماسك بالكيس اصلو كان فاكر ان مايزال فيه الدجاجه واصدقائها ولكنه وقع فى الماء الذي غطس فيه بسب الحجاره ولم يظهر له اى اثر من ساعتها.

فى منزل الدجاجه والديك والفار كانت هناك حاله من النشاط والتعاون واصرا الديك والفار ان تستريح الدجاجه فى هذا اليوم وعلى احسن كرسى كمان فى البيت وعاشوا سعداء جميعا بدون ازعاج من الثعالب مره اخري ....

توته توته خلصت الحدوته حلوه ولا ملتوته

حدوتة بير زويلة

حدوتة بير زويلة

كان يا مكان و لا يحلى الكلام الا بذكر النبى عليه الصلاة و السلام

كان فى فلاح عندو حتة أرض زارعها برسيم , و كان عندو قطة و كلب و معزة و حمار فى يوم من الايام صحى الفلاح و ملقاش البرسيم , سأل الحيوانات مين اللى فيكم اللى أكل البرسيم ؟ كلهم قالوا احنا مكلناش البرسيم

الفلاح قالهم طيب , احنا هنروح على بير زويلة و هنحلف عندو اللى أكل البرسيم هيقع فى بير زويلة يومين و ليلة

القطة راحت عند بير زويلة و قالت : بير زويلة يا بير زويلة , نو نو, ان كنت كلتو , نو نو , و لا شربتو , نو نو , أقع فى بير زويلة يومين و ليلة , و نطت , و موقعتش فى البير

الكلب راح عند بير زويلة و قال : بير زويلة يا بير زويلة , هو هو , ان كنت كلتو , هو هو, و لا شربتو , هوهو , أقع فى بير زويلة يومين و ليلة , و نط , و موقعش فى البير

المعزة راحت عند بير زويلة و قالت : بير زويلة يا بير زويلة , ماء ماء , ان كنت كلتو , ماء ماء , و لا شربتو , ماء ماء , أقع فى بير زويلة يومين و ليلة , و نطت , و موقعتش فى البير

الحمار راح عند بير زويلة و قال : بير زويلة يا بير زويلة , هاء هاء , ان كنت كلتو , هاء هاء , و لا شربتو , هاء هاء , أقع فى بير زويلة يومين و ليلة , و نط , ووقع فى البير

الحمار قعد يصرخ و يقول الحقوووووووووووووونى يا أصحابى , طلعونى من بير زويلة , سامحونى انا مش هعمل كدا تانى

أصحابة قالولو , احنا مش أصحابك عشان انت كذاب و أكلت البرسيم بتاع صاحبنا الفلاح و خليك بقى فى بير زويلة يومين و ليلة .

و توتة توتة خلصت الحدوتة , حلوة و لا ملتوتة !!

حدوتة الفأرة المغرورة

حدوتة الفأرة المغرورة

كان يا مكان و لا يحلى الكلام الا بذكر النبى عليه الصلاة و السلام

مرة كان فيه فأرة ..حاطة فى دماغها انها جميلة جدا وانها افضل من كل صديقاتها ..وانها وانها وانها وفى يوم راحت تتمشى .......فوجدت قطعة معدنية من النقود

فرحت جدا جدا ......قالت انا حشترى آيس كريم ..ليا ولأصحابى

وبعدين قالت ..طيب ولأصحابى ليه ؟؟ لا .. ليا لوحدى ...وبعدين قالت ..لا لو اشتريت آيس كريم ...حاكله ومش حاتفضل سعادتى بالفلوس ...فكرت وفكرت ...وقالت انا حشترى شريط جميل لونه روز .. وهحطه فى شعرى ....

الفارة وقفت فى الشباك سعيدة قوى بنفسها

مرت الفئران ...قالوا لها يافأرة انتى جميلة جدا .....بصت لهم وقالت لهم مانا عارفة

مر الكلب وقال لها يافأرة شكلك رائع ..تتجوزينى ؟؟؟قالت له سمعنى صوتك .....راح هوهو ......قالت له صوتك مزعج

مر الحمار قال لها شكلك جميل قوى ...تتجوزينى ؟؟؟قالت له غنى لى ......غنى لها .....قالت له صوتك وحش جدا وابعد عنى

مر الديك وقال لها انتى جميلة جدا تتجوزينى ؟؟؟قالت له ايه ميزاتك ؟؟ قال لها اصحى الكل فى الفجر واقول كوكو كوكو..قالت له انت مزعج ..انا ذنبى ايه اصحى بدرى وانا بحب النوم

مر القط ....وقف قدامها .......و فجأة راح وكلها هم هم و هي عماله تنادى على كل الفيران اصحابها و الكلب و الحمار و الديك

بس محدش رد عليها لان كلهم كانوا بعدوا و سابوها لوحديها عشان هي مغرورة قوي

و توته توته فرغت الحدوته

حدوتة الأسد و الفار

حدوتة الأسد و الفار

كان يا مكان و لا يحلى الكلام الا بذكر النبى عليه الصلاة و السلام

كان الأسد ملك الغابة نايم , و فجأة حس ان فى حاجة صغننة مشيت على رجله , بص لقى فار صغير , فقاله إنت يا فار يا صغير اللى مشيت على رجلى و صحتنى من النوم , أنا لازم أكلك عشان تحرم

الفار قال للأسد : أرجوك متاكلنيش أنا مش هعمل كدا تانى , و كمان أنا مش هشبعك

الأسد قالو : لاه أنا لازم أكلك عشان تحرم

الفار قال للأسد : أنا آسف , متاكلنيش و أنا أوعدك انى هساعدك فى اى مشكلة تقع فيها

الأسد ضحك و قال : ها ها ها بقى انت يا فار يا صغير هتساعدنى انا ملك الغابة !!, على العموم تقدر تمشى أنا سامحتك

بعد كام يوم و الفار ماشى فى الغابة لقى الاسد موجود جوا شبكة الصياد , أصل الصياد كان بيعمل الشبك دا عشان يصطاد بيه الحيوانات

الفار قعد يقرقض فى الشبكة لحد ما عمل فتحة على أد حجم الأسد , و بعدين الاسد خرج من الشبكة و جري هوا و الفار بعيد عن الصياد و الشبكة

الأسد قال للفار أنت حجمك صغير صحيح , لكنك أنقذت ملك الغابة شكرا ياااااااااااااااااااااا صديقى

و توتة توتة خلصت الحدوتة , حلوة و لا ملتوتة

حدوتة الجيران السعدا

حدوتة الجيران السعدا

كان يا مكان و لا يحلى الكلام الا بذكر النبى عليه الصلاة و السلام

كان فيه يا حلوين جيران ساكنين قدام بعض، الجار اللي على الشمال كان عايش هو ومراته بس لأن أولادهم كبروا واتجوزا ومشيوا من البيت وكان عندهم دهب وجواهر وفلوس كتير اوي

والجار اللي على اليمين كان عايش راجل ومراته وأولاده وكان فقير جدا

في بيت الجار الفقير كان ضحك ولعب ومزيكا وسرور

وفي بيت الراجل الغني صمت وسكون وحزن

مرات الراجل الغني خبطت على باب الفقير وسألتهم : انتم ليه دايما عندكم فرح وسرور وضحك ، فردوا عليها ان عندهم لعبة من الدهب، وبيلعبوا بيها كل يوم ، وعشان كده هما دائما فرحانين

الراجل الغني قال لمراته احنا عندنا فلوس كتير وتعالي نشتري كرة دهب كبيرة

وفعلا اشتروا كرة دهب وزنها 10 كيلو، وابتدوا يلعبوا بيها . هو يحدفلها تيجي في وشها تعورها وهى ترميهاله تاني تيجي في راسه تعوره

راحوا تاني عند الجيران وحكوا ليهم الحكاية وطلبوا منهم يشوفوا لعبتهم

فقام الجيران الفقرا فتحوا باب البيت ووجدوا طفل جميل طول النهار يلعبوا معاه وهو كان سبب سعادتهم وفرحهم.

و توته توته خلصت الحدوته .....حلوة و لا ملتوته

حدوتة الارنب الغضبان

حدوتة الارنب الغضبان

كان يا مكان و لا يحلى الكلام الا بذكر النبى عليه الصلاة و السلام

كان فى مرة أرنوب صغير , قال لمامتو أنا جعان يا ماما , مامتو قالتلو كل خس و جزر يا ارنوب
أرنوب قالها : يوووووووووه هوا كل يوم خس و جزر أنا مش واكل , و خرج برا البيت

الأرنوب قعد يمشى يمشى لحد ما جاع خالص , قابل البطة فقالها يا بطة انا جعان , البطة قالتلو تعال يا ارنوب اصطاد معايا سمك من البحيرة و كل , الارنوب قالها : الارنب مش بياكل سمك يا بطة و سابها ومشى

الأرنوب قعد يمشى لحد ما قابل الفرخة فقالها يا فرخة انا جعان , الفرخة قالتلو تعال يا ارنوب كل معايا قمح من الارض , الارنوب قالها : الارنب مش بياكل قمح يا فرخة و سابها و مشى

الأرنوب قعد يمشى يمشى لحد ما قابل القطة فقالها يا قطة انا جعان , القطة قالتلو تعال يا ارنوب اشرب معايا لبن , الارنوب قالها : الارنب مش بيشرب لبن يا قطة و سابها و مشى

الأرنوب قعد يمشى يمشى لحد ما قابل الكلب , فقاله يا كلب انا جعان , الكلب قالو تعال يا ارنوب كل معايا العطمة دى , الارنوب قاله : الارنب مش بياكل عطم يا كلب و سابه و مشى

الارنوب رجع البيت و قال لمامتو أنا آسف يا ماما و مش هعمل كدا تانى و انا جعان

مامتو قالتلو مفيش غير الخس و الجزر يا أرنوب

الارنوب قال و أنا بحب الخس و الجزر و هاكلو على طول

و توتة توتة خلصت الحدوتة , حلوة و لا ملتوتة

حدوتة الملك الحزين

حدوتة الملك الحزين

كان يا مكان و لا يحلى الكلام الا بذكر النبى عليه الصلاة و السلام

كان فيه ملك من كتر ما عنده كل حاجه و مش محتاج حاجه زهق و بقى مكتئب و حزين خالص و ما فيش حد من المضحكاتيه عارف يضحكه

راح الملك متنكر و غير شكله و نزل السوق و هناك لقى بيت فقير و فيه شمعه منورة و راجل بيغنى و مبسوط استغرب جدا هو مبسوط لية ؟

فخبط عليه , الراجل قال مين ؟ , الملك قاله انا عابر سبيل , الراجل قاله اهلا و دخله و عزمه على الأكل وكان رغيف و حته جبنه , الملك سأله انت مبسوط ليه الراجل قاله و ما أبقاش مبسوط ليه انا صحتى كويسه و ضميرى مرتاح ,,,الملك سأله انت بتشتغل ايه قاله انا نجار .

المهم الملك روح و تانى يوم أمر وزيره انه يقفل كل دكاكين النجارين و بالليل راح لصاحبنا لاقاه منور شمعتين و بياكل بيض و فول و بيغنى برضو .... سأله ازاى و انا سامع ان الملك قفل دكاكين النجارين

قاله و مالو انا ما سكتش دورت على شغل و اشتغلت فى دكان حلاق ....المهم تستمر الحدوته و كل ما يشتغل فى حته الملك يقفلها له و مع ذلك احوال الراجل الغلبان بتتحسن و لسه مبسوط لحد ما قفل الدنيا كلها و راح له لقاه بيغنى برضه و جدد بيته خالص و بياكل لحمه و فراخ

استغرب الملك جدا
و بعدها عرف ان الدنيا لما قفلت فى وش الرجل راح يصطاد طلعت له سمكه بيفتحها لقى فيها خاتم باعه و اشترى بيه اكل و جدد البيت لأن ربنا هو اللى بيرزق و ما حدش بيتدخل فى رزق حد

و توته توته خلصت الحدوته .....حلوة و لا ملتوته

حدوتة جلال و الفول

حدوتة جلال و الفول

كان يا ما كان و لا يحلى الكلام الا بذكر النبى عليه الصلاة و السلام

كان فى ولد صغير اسمه جلال ,, فى يوم مامته صحته من النوم و قالتلو : اصحى يا جلال اصحى يا حبيبى عشان تفطر

جلال قال لمامته : صباح الخير يا ماما هوا الفطار ايه ؟

مامته قالتلو : هتفطر فول يا حبيبى

جلال قال : يووووووووووووووووووه هوا كل يوم فول , أنا مش واكل الفول دا

مامة جلال راحت للعصاية و قالت ليها : يا عصايا تعالى اضربى جلال عشان مش راضى ياكل الفول العصايا قالت : أنا ماليش دعوة

مامة جلال راحت للنار و قالت ليها : يا نار تعالى احرقى العصايا عشان مش عاوزة تضرب جلال عشان جلال مش راضى ياكل الفول النار قالت : أنا ماليش دعوة

مامة جلال راحت للماية و قالت ليها : يا ماية تعالى طفى النار عشان مش عاوزة تحرق العصاية اللى مش عاوزة تضرب جلال عشان جلال مش عاوز ياكل الفول الماية قالت : انا ماليش دعوة

جلال راحت للبقرة و قالت ليها : يا بقرة تعالى اشربى الماية عشان مش عاوزة تطفى النار اللى مش عاوزة تحرق العصاية عشان مش عاوزة تضرب جلال عشان جلال مش عاوز ياكل الفول البقرة قالت : انا ماليش دعوة

مامة جلال راحت للفلاح و قالت له : يا فلاح تعال ادبح البقرة عشان مش عاوزة تشرب الماية اللى مش عاوزة تطفى النار اللى مش عاوزة تحرق العصاية عشان مش عاوزة تضرب جلال عشان جلال مش عاوزة ياكل الفول الفلاح قال : انا ماليش دعوة

مامة جلال راحت لمامة الفلاح و قالت ليها : تعالى اضربى الفلاح عشان مش عاوز يدبح البقرة اللى مش عاوزة تشرب الماية اللى مش راضية تطفى النار اللى مش عاوزة تحرق العصاية اللى مش راضية تضرب جلال عشان جلال مش عاوز ياكل الفول

مامة الفلاح قامت تضرب الفلاح , الفلاح قام بسرعة يدبح البقرة , البقرة راحت بسرعة تشرب الماية , الماية راحت بسرعة تطفى النار , النار راحت بسرعة تحرق العصاية , العصاية راحت بسرعة تضرب جلال , جلال قام بسرعة و أكل الفول

و توتة توتة خلصت الحدوتة , حلوة و لا ملتوتة !!